भंडारा-गोंदियात १८ उमेदवारांमध्ये रंगणार रणसंग्राम
◼️भाजपा विरूद्ध काँग्रेस थेट लढत
गोंदिया : भंडारा-गोंदिया लोकसभा मतदार संघात आज 30 मार्च रोजी उमेदवारी अर्ज मागे घेण्याचा शेवटचा दिवशी एकूण 22 उमेदवारी अर्जांपैकी, आज 4 उमेदवारांनी आपला उमेदवारी अर्ज मागे घेतला आहे. त्यामुळे आता एकूण 18 उमेदवारांमध्ये रणसंग्राम होणार आहे. यात थेट लढत भाजपा-काँग्रेसच्या उमेदवारांमध्ये दिसणार आहे.
लोकसभा निवडणुकीचे नामांकन दाखल करण्याच्या शेवटच्या दिवशी 27 मार्च रोजी 40 उमेदवारांनी 49 अर्ज दाखल केले होते. ज्यापैकी छानणीत 15 अपक्ष उमेदवारांसह 22 उमेदवारांचे अर्ज वैध ठरले होते. दरम्यान आज, अर्ज मागे घेण्याचा शेवटचा दिवस असता 4 उमेदवारांनी आपला अर्ज मागे घेतला आहे. त्यामुळे 18 उमेदवार आता रिंगणात असून थेट लढत काँग्रेसचे प्रशांत पडोळे विरुद्ध भाजपाचे सुनील मेंढे अशीच राहणार आहे. तर दूसरीकडे भाजपमधून बंडखोरी करत बीएसपी कडून उमेदवारी मिळालेल्या संजय कुंभलकर हे भाजपचे किती मत आपल्याकडे वळविण्यात यशस्वी होतात यावर लक्ष राहणार आहे. महत्वाचे म्हणजे वंचित कडून संजय केवट यांना उमेदवारी असली तरी या निवडणूकीत भंडारा गोंदिया लोकसभा मतदार संघात वंचीतला जनाधार नसल्याचे चित्र सध्यातरी पहायला मिळत आहे. त्यामुळे सरळ लढत काँग्रेस विरुद्ध भाजपा अशीच पहायला मिळणार आहे.