एक कोटी ८१ लाखाची रक्कम जप्त
◼️नाकेबंदी दरम्यान भरारी पथकाची कारवाई
गोंदिया : निवडणुकीदरम्यान होणाऱ्या आर्थिक व्यवहाराला आळा घालण्यासाठी नेमण्यात आलेल्या चमुने आज, (ता. २७) दोन ठिकाणी केलेल्या नाकाबंदी कारवाईत १ कोटी ८१ लाख रुपये जप्त करण्यात आले. ही कारवाई जिल्ह्यातील गोरेगाव तालुक्यातील सोनी व मुंडीपार तपासणी नाक्यावर करण्यात आली.
जिल्हाधिकारी प्रदीप नायर यांच्या मार्गदर्शनात निवडणुकीदरम्यान होणाऱ्या आर्थिक व्यवहारावर आळा घालता यावा यासाठी भरारी पथक नेमण्यात आले असून जिल्ह्याच्या सीमारेषेवर व प्रत्येक तालुकास्तरावर तपासणी नाका उभारण्यात आले आहे. दरम्यान, आज, ( ता. २७)निवडणूक निर्णय अधीकारी पूजा गायकवाड, तहसीलदार किसन भदाणे व इंद्रायणी गोमासे यांच्या मार्गदर्शनाखाली गोरेगाव तालुक्यातील सोनी नाका जवळ एफएसटी व एसएसटी पथक प्रमुख बाबा शिंदे,सरिता लिलहारे, विलास सूर्यवंशी, रंजना चानप , रामानंदा दास, श्यामकला भोयर, संदीप पटले यांनी संयुक्त कारवाई करत १ कोटी ७६ लाख रुपये जप्त केले. त्याचबरोबर दुसरी कारवाई मुंडीपार नाक्यावर करण्यात आली असून नाकाबंदीदरम्यान पुन्हा ५ लाख रुपये रोख जप्त करण्यात आले. ही कारवाई एफएसटी-३ व एसएसटी-२ पथक प्रमुख बाबा शिंदे,संदीप बागडे, विलास सूर्यवंशी, राकेश नागपुरे , रामानंदा दास, श्यामकला भोयर , संदीप पटले यांनी केली. दरम्यान गोरेगावचे ठाणेदार अजय भुसारी यांनी कायदेशीर कार्यवाही केली.
००००००